網民實戰交友App分享

好多人都玩過交友App,亦有唔同心得。我地今次就搵到呢位網民既分享

大家好,平時我有睇開呢個page,不過都係齋睇,近排好似多左人講dating app,所以決定開返個acc(username都係香討隨機幫我改架咋哈哈), 分享下自己嘅交友app嘅野。

如果多人睇我會再分享下由認識到見面嘅過程。伸返條脷先,呢個post純分享,有問題/意見/同感可留言,但冇意在此認識男仔,不用pm,同埋唔好惡意攻擊或罵街,我心靈好脆弱,多謝。仲有呀,我係女呀,唔洗留言話基路難行我都知道好難行

講返自己先,之前係其他post見到有網友話玩交友app離不開係sell 美容/保險/倫敦金/搵SP嘅人,正常嘅男仔或者女仔點會用呢啲app,一定係有社交障礙,毒L/宅女等等。其實我正正就係果啲真係認真想識朋友嘅正常人。

點解我會話想喺app度識朋友而唔係男朋友呢?喺我嘅立場係覺得,話明係交友app,梗係由朋友做起啦,如果你真係當佢係一個識朋友嘅工具,包袱可能冇咁大,如果真係大家合眼緣嘅,發展到嘅,會係一個bonus,我都真係試過喺app度識到志同道合嘅朋友。

問:點解我要玩交友app?
講真有頭髮邊個想食咖喱丫,我果行基本冇乜機會識到異性,玩交友app 算係一種快靚正嘅途徑,當然大家都知道網上騙案多,但自己小心啲囉,玩得耐你就知道邊啲係sell 野邊啲係已婚。基本上識得保護自己,唔會有咩損失,最多蝕左兩張profile pic比人睇姐。

講返自己小小資料(拿小小咋),就黎奔三(淚),唔太sure自己係咪要拍拖結婚,所以有就有試下,冇就冇囉。樣子正常,收入正常,唔港女,識煮野食,鍾意行山游水。題外話,之前有人問過我點先為之煮識野食?上網搵recipe都煮到啦。我個定義好間單,你煮開飯你熟悉材料用途,知道煮乜要落乜就已經verygood ,例如生粉麵粉澄麵太白粉木薯粉糯米粉高中低筋麵嘅分别。我當然有好多缺點,唔講啦哈。總結自己我會覺得自己係,你唔會比我外表吸引但識落又可能發掘到有趣嘅一面。

下回會講下自己玩咩交友app(非廣告,app 唔會開名),同自己放相同揀男仔嘅心得,多多支持,謝!

。。。。2017-5-16更新(1)。。。。
多謝大家留言,我全部睇曬但未能逐一回覆,雖然話題離不開交友apps有冇用,不過都係果句啦,有心用嘅朋友,祝你地真係搵到如意郎君。成日識到美容保險業果啲朋友,亦都唔好灰心,你睇呢個post都見到好多人真係認真想識人的,努力。

入正題,好多交友apps都用過,但好多都真係麻麻地。我而家用緊兩個apps,唔知可唔可以開名不過我再講落去大家都應該知係邊兩個。

簡介返個玩法先in case有人真係未玩過。第一個係T字頭,我化佢名做天打啦。天打呢就係你登記左之後,你可以選擇篩選條件,但只限性别,年齡層同距離,之後個app就會比一大堆異性相你,每個異性你都可以click入去逐張睇佢地嘅相,有啲人會寫啲野介紹自己,或者show佢地ig嘅相,你順手可以睇埋,有興趣嘅你就比like,冇興趣就打個交叉或者將張相撥左邊。如果大家同時比like大家,佢就會彈出一個畫面寫住“its a match!”恭喜你,你地可以正式傾計。仲有一樣野叫super like,就係如果你見到一個異性,好鍾意佢到不能自拔果隻,直頭覺得佢萬中無一,咁就即管比super like 啦,如果你係比左superlike 對方,對方就會有notification,但比普通like嘅話,人地事前係唔會知的。不過superlike 好似每日得一次如果唔係要比錢買?有錯請指正
(通常如果有人比superlike我,我都會比返個like佢,就算未必係自己杯茶)

講下我自己對呢個天打嘅感覺,當然佢有好有唔好嘅地方。

1)首先佢鼓勵踴躍參與,因為你唔主動比like人,係促成唔到配對的。
但係!呢樣野衍生左另外一個問題,就係有好多人,會瘋狂比like,通常果啲人,就係美容保險界精英,唔理好醜但求就手。
亦都有app友同我分享過,佢一開頭都好認真玩,但match得太少,所以之後全比like,睇下有冇多d 機會。

2)呢個app睇樣成份居多。拿咪鬧住,我知你實想講個個app都係睇樣,不過天打雖然有一欄係可以比你打啲簡介,但係又未必個個會打,就算打嘅都係簡單一兩句,所以要憑佢嘅相決定究竟要唔要比like。

3)天打要互相like 左先傾到偈,呢樣野已經好過好多其他app(或者有人覺得唔好)。有好多app,例如“是尻”都係可以隨便同人傾計,男仔我唔知,但女仔唔知有冇同感,每日都有一百幾十個人send msg比你,因為冇限制,所以d 用家會狂風掃落葉式大包圍,而且果個app太食電(已停用n年,唔知而家仲係咪咁),我個人遇到最多推銷員的就係呢個食電app。


首先多謝大家PM 尤其是鼓勵的説話,我今次真係成世人第一次開post,同大家分享,當然唔只係我分享,我見大家都留comment分享自己嘅事,成功又好失敗又好,都係一個經歷丫。

我先skip左cmb果part 先費時被誤會係打手

今次講下自己揀人嘅準則,我都好想大家留言share下,到底玩交友app嘅時候,你鍾意揀邊類型嘅男仔/女仔,等各位師兄師姐可以參考下,提高命中率。因為好多時候,睇左相之後你已經對果個人有個主觀嘅印象。

我自己通常都擺兩三張相,一張近鏡,一張全身,絶無P圖,我覺得P圖真係自己搵自己笨架咋,貨不對辦周時有架啦唔洗我講,新聞都見得多,除非你真係諗住純粹上網R水吹,永不露面咁就另一回事。

其實我都會手賤,試下search下其他玩呢個app嘅女仔係咩樣,結果都係同現實生活一樣囉,燕瘦環肥乜都有,有啲真係唔化妝或淡妝都好靚(羡慕mode),有啲就好濃妝,唔知各位師兄識唔識分,但我地女仔一睇張相大概就知佢落左妝係乜樣,濃妝真係伏味濃架。

我自己玩app嘅立場係
1認真玩2小心為上
3要有自知之明唔好不自量力

講下自己鍾意揀邊啲男仔/佢放咩相會吸引到我先。
男仔放咩相我一定unlike?
1)飛機師
呢個純粹我個人偏見

2)曬車匙跑車名錶
呢類人有機會係sell野,如果唔係sell野,我更加唔會like,我愚見係,點解要用呢啲野吸引人?可能你只會引黎拜金女嘅興趣。我記得以前有個professor同我地講,當一個人認為自己除左有錢之外一無是處,就會用錢掩飾自己其他不足(sorry我認真左,可能post跑車嘅人真係純粹想分享下架車隻色好靚)
同埋,你太有錢,我好草根,我地係兩個世界嘅人

3)肌肉男
show 肌肉close up果啲係搵sp架喎,呢個係不明文規矩(好似係)

4)全部相都戴超
係咪真係去到邊度都咁猛太陽先,有心交朋友就比人見下你真面目

講到我好似好奄尖咁,其實每個人都係外貌協會,但唔代表只鍾意靚仔或者靚女,只係每人心目中都對唔同嘅外型有唔同嘅喜好,講到尾都係合眼緣姐,如果你話靚女/靚仔先合眼緣,ok你贏。

平時我like嘅男仔,通常佢地都係攬住d貓貓狗狗,因為我自己都有養小動物,如果match左講寵物已經可以係一個好襟傾嘅話題,另外,其實post下啲好正常嘅相,例如旅行相呀,行山相,只要比到我嘅主觀感覺你係生活健康,陽光,已經好like

好啦,到你地,各位師兄師姐分享下如果男仔/女仔擺咩相會吸引到你地。

 

原連結:http://ladies.discuss.com.hk/viewthread.php?tid=26654386&extra=&authorid=6111365&page=1