打工仔點識異性?交友方法大全 2018

香港雖然地方細,落街隨處都係一堆人,但要識到新朋友其實不易,更不要說男女朋友。特別對於打工仔黎講,日常已經要應付老闆客人,邊有心機時間再去認識其他人呢?而且好多工種都係比較男性化/女性化(例如地盤、護士就係極端例子),要識到另一半都咪話唔難。雖然如此,各位又不必絕望住,其實香港仲有好多方法識到其他人,我地就列舉以下各種方法。由淺入深,一步步睇下自己可以去到邊步啦!

工作環境認識

呢個係最簡單最直接,正所謂日久生情,近水樓台先得月,日見夜見要識到男女朋友其實唔難。如果你錯過左大學、中學既識人階段,打工仔階段都仲可以認識下身邊同事既,如果咁啱你同公司有同齡既朋友,唔好話男女朋友咁長裹,大家可以share同一年齡層既事都係值得開心既。不過如果想進一步發展,就要留意事業愛情會否互相阻礙啦。畢竟俗語有講「邊度食唔好邊度屙」,小心惹黎辦公室閒言閒語。

但正如開頭咁講,香港地邊有咁多工係可以識到另一半呀,唔緊要,仲有其他方法。

參加興趣班

坊間有好多興趣班,適合不同年齡層既人參加。由跳舞、運動健身到文藝書法、畫畫班都得架!參加興趣班識人既好處就係大家可以一邊一齊參與同一件事,一邊互相傾計了解下,就算dead air都唔會咁尷尬。而且好多時由於大家有共同嗜好,話題亦比較容易打開,唔駛再淨係重覆問「你住邊」「做緊咩」咁無聊啦,搵soul mate都容易d。不過要留意參加既興趣班會否太男性化/女性化,如果你想識男仔,參加yoga班就未必係最好選擇。相反如果你想識女仔,有勇氣參加yoga班相信你一定有斬獲。

 

朋友派對

呢個係都市人另一熱門認識男女朋友既方法。即使你身邊無異性朋友,總會有朋友係有的。例如朋友的女朋友生日咁,好多時都會有該壽星女的大中小學同學朋友參加,當中好多時不乏女性。只要好好把握機會係聚會中互相認識﹐尋找共同興趣,派對完後再私下約出黎約會咁,其實唔難成功。不過要小心唔好次次懷著呢d企圖參與朋友派對,有d朋友都係會介意你借佢過橋的。呢種friend搭friend認識異性的方法相信都係最古老而不衰的方法。接下來介紹一些較為新興的方法。

網上交友

雖然話新興,網上交友其實都已經好多年歷史。由最早既yahoo有緣人一路到而家既交友App,其實背後都係萬變不離其宗。兩個單身人士上網互相因應對方興趣、外型、年齡等條件進行配對。而家既交友App更五花百門,不同戀愛哲學既人都可以搵到適合的App。你可以選擇一個最適合自已的App,享受跟不同的陌生人傾計談心,繼而找出自已的真命天子。不過要小心呢類App亦同時好多Sales搵食,各位要小心財物損失。

 

Speed Dating

如果以上各種都唔適合唔緊要,以前有相睇,而家有Speed dating。同相睇不同既係,相睇好多時會有個中間人,大部份係家人、親戚、朋友安排,因為大家都認識呢位幫手中的中間人,無形中會對相睇既雙方都造成壓力,覺得睇唔啱就好似浪費左佢精力時間咁。因此Speed Dating既產生就解決左呢個問題,成個商業模式就係一個陌生人收了你錢,然後介紹女仔/男仔給你認識咁。既然俾左錢做左消費者,自然無咁大壓力,睇中定睇唔中都唔需要同其他人交代(除左銀包)。而呢d speed dating好多時會有唔同要求,因應雙方條件要求而進行配對,唔駛驚好似交友App咁乜人都用得上得。